З ініцыятывай стварыць асацыяцыю раней выступіў беларускі бок.
Плануецца, што новая структура будзе садзейнічаць развіццю супрацоўніцтва па пытаннях рэгулявання ядзернай і радыяцыйнай бяспекі на прасторы СНД, аказанню экспертнай падтрымкі пры ўдасканаленні сістэмы рэгулявання і заканадаўства, умацаванню сувязяў паміж арганізацыямі навукова-тэхнічнай падтрымкі.
"Ініцыятыва вельмі важная, асабліва для краін-пачаткоўцаў, якія рэалізуюць свае першыя ядзерныя праграмы. Такія асацыяцыі ёсць у Еўропе, бачна эфектыўнасць іх працы, у тым ліку і на міжнароднай арэне, - адзначыў Міхаіл Міхадзюк. - Такі фармат узаемадзеяння ў рамках СНД дазволіць пашырыць партнёрства і скаардынаваць працу рэгулюючых органаў".
У сваю чаргу начальнік Дэпартамента па ядзернай і радыяцыйнай бяспецы Міністэрства па надзвычайных сітуацыях (Дзяржатамнагляду) Вольга Лугоўская дадала, што стварэнне асацыяцыі дазволіць больш эфектыўна выбудаваць працу па абмене вопытам. У тым ліку па пытаннях распрацоўкі нарматыўных патрабаванняў у галіне ядзернай і радыяцыйнай бяспекі, методык правядзення інспекцый на пляцоўках АЭС, а таксама экспертыз бяспекі. Важнымі таксама з'яўляюцца пытанні рэгулявання ў сферы абыходжання з радыеактыўнымі адходамі, падрыхтоўка кадраў для рэгулюючых органаў і іншыя.
На пасяджэнні камісіі разгледжаны вынікі рэалізацыі Рамачнай праграмы супрацоўніцтва краін СНД у галіне выкарыстання атамнай энергіі ў мірных мэтах "Супрацоўніцтва "АТАМ-СНД", ход выканання міждзяржаўнай мэтавай праграмы"Рэкультывацыя тэрыторый дзяржаў, якія падвергліся ўздзеянню ўраназдабываючых вытворчасцяў".
Размова таксама ішла аб дзейнасці базавай арганізацыі краін СНД па пытаннях абыходжання з адпрацаваным ядзерным палівам, радыеактыўнымі адходамі і вываду з эксплуатацыі ядзерна- і радыяцыйна небяспечных аб'ектаў. Было адзначана, што экспертамі міжнародных рабочых груп камісіі падрыхтаваны праекты новых дакументаў, якія вызначаць яе далейшую дзейнасць - Рамачная праграма супрацоўніцтва дзяржаў - удзельніц СНД у галіне мірнага выкарыстання атамнай энергіі на перыяд да 2030 года і план мерапрыемстваў па рэалізацыі Рамачнай праграмы супрацоўніцтва дзяржаў - удзельніц СНД у галіне выкарыстання атамнай энергіі ў мірных мэтах на перыяд 2021-2025 гады. Плануецца, што гэтыя дакументы будуць прыняты на пасяджэнні Савета кіраўнікоў урадаў СНД у лістападзе гэтага года.
