Праверка пачалася з усталявальнай нарады, падчас якой з кіраўніцтвам атамнай электрастанцыі і кіраўнікамі структурных падраздзяленняў прадпрыемства былі абмеркаваныя мэты і задачы праверкі.
Адкрываючы нараду, першы намеснік генеральнага дырэктара - галоўны інжынер АЭС Анатоль Бондар адзначыў, што гэта першая ў гісторыі Беларускай АЭС партнёрская праверка САА АЭС-МЦ і выказаў надзею, што яна пройдзе ў атмасферы ўзаемаразумення, адкрытасці і супрацоўніцтва.
"Думаю, што за гэтыя 2 тыдні мы зможам прадэманстраваць камандзе экспертаў САА АЭС-МЦ нашу здольнасць забяспечыць высокі ўзровень бяспекі і надзейнасці пры эксплуатацыі энергаблокаў станцыі. А ўсе прапановы і рэкамендацыі каманды будуць станоўча ўспрынятыя і ўлічаны ў далейшым пры эксплуатацыі АЭС", - падкрэсліў Анатоль Міхайлавіч.
У слове ў адказ кіраўнік каманды экспертаў Дзмітрый Зеркаль сказаў, што мэта партнёрскіх праверак САА АЭС "максімальна павышаць бяспеку і надзейнасць АЭС ва ўсім свеце, прыкладаючы сумесныя намаганні для ацэнкі, параўнання з лепшымі дасягненнямі і ўдасканаленні эксплуатацыі з дапамогай узаемнай падтрымкі, абмену інфармацыяй і выкарыстання станоўчага вопыту".
Камандзе экспертаў была прадастаўлена інфармацыя аб асноўных паказчыках і бягучым эксплуатацыйным стане энергаблокаў №1 і №2 Беларускай АЭС, пасля чаго эксперты, у суправаджэнні кіраўнікоў і работнікаў Беларускай АЭС ажыццявілі абыход будынкаў і збудаванняў па розных маршрутах у рамках праграмы партнёрскай праверкі САА АЭС.
Планавая партнёрская праверка САА АЭС-МЦ працягнецца да 27 сакавіка 2025 года. У складзе каманды экспертаў вопытныя спецыялісты з 4 дзяржаў: Балгарыі, Ірана, Кітая і Расіі.
