На Беларускай атамнай электрастанцыі працуюць дзевяць мужчын, у чыіх лёсах быў Афганістан. Напярэдадні памятнай даты, 14 лютага, у цёплай абстаноўцы словы ўдзячнасці воінам-інтэрнацыяналістам гучалі ад генеральнага дырэктара Сяргея Алегавіча Бабовіча: "Дзякуй за тое, што вы зрабілі, за тое, што вы ёсць, за тое, што з'яўляецеся прыкладам для сучаснага пакалення. Мы памятаем і ніколі не забудзем пра ваш подзвіг."
Да Дня памяці воінаў-інтэрнацыяналістаў была прымеркавана і акцыя "Адслужылі, як трэба, і вярнуліся". Маладых спецыялістаў, якія прайшлі тэрміновую службу ў воінскіх падраздзяленнях Рэспублікі Беларусь, павіншавалі і ўручылі ім памятныя падарункі. У родны працоўны калектыў у 2024 годзе вярнуліся тры маладыя чалавекі.
