Студэнты не толькі працуюць, але і адпачываюць.
- Практычна кожны дзень у нас праходзяць мерапрыемствы і акцыі, - распавёў камісар Усебеларускай маладзёжнай будоўлі Мікіта Саўкін. - Спаборніцтвы па футболе, валейболе, настольным тэнісе, цаліннае 8 Сакавіка - у гэтым годзе разам з намі працуюць і дзяўчаты - і Новы год, конкурс цалінных лагераў - усё гэта і многія іншыя мерапрыемствы запомняцца надоўга.
Падарожнічаюць хлопцы і па раёне: пабывалі ў самых прыгожых месцах Астравеччыны і выпрабавалі сілы і спрыт, прайшоўшы трасу вяровачнага гарадка спартыўна-аздараўленчага комплексу «Імпульс». Эмоцыі і ўражанні, кажуць, атрымалі незабыўныя.
А ў мінулыя выхадныя ўсе атрады зноў сабраліся разам, каб прадэманстраваць таленты ў стаўшым ужо традыцыйным «АтамФЭСЦе».
- У нядзелю ў кінаканцэртнай зале «Астравец» сабралася 5 атрадаў. Хлопцы з 6-га працуюць і ў выхадныя , - кажа Мікіта Саўкін.
«АтамФЭСТ» - творчы фестываль. На яго студатрадаўцы прадставілі па адным нумары ў трох намінацыях: «Харэаграфія», «Музыка», «Арыгінальны жанр».
Песні, фокусы, тэатральныя пастаноўкі, танцы - фантазіі і творчым здольнасцям студэнтаў можна было пазайздросціць. Што да вынікаў фэсту, то імёны пераможцаў журы вырашыла захаваць у таямніцы - іх абвесцяць на закрыцці семестра.
Літаральна праз некалькі дзён хлопцы пакінуць Астравец - раз'едуцца па сваіх гарадах і ВНУ з надзеяй у наступным годзе сустрэцца зноў у горадзе маладосці Астраўцы.
