Пандэмія каранавіруса, якая паралізавала на некаторы час масавыя мерапрыемствы, паволі адступае. Расслабляцца пакуль рана, аднак аматары спорту паступова вяртаюцца ў звыклае рэчышча. Вось і прафсаюзны актыў Беларускай АЭС, прытрымліваючыся рэкамендацый аб абмежаванні масавых спаборніцтваў, арганізаваў анлайн-забег, дзе тры дзясяткі работнікаў прадпрыемства ў завочным фармаце выяўлялі самага цягавітага спартсмена.

Па ўмовах спаборніцтва пераможцам станавіўся той, хто за пяць каляндарных дзён пераадолее найбольшую адлегласць без прымянення механічных сродкаў перамяшчэння, гэта значыць бегам або крокам.

Штодзённы час бесперапыннай актыўнасці абмяжоўвалася адной гадзінай, па выніках якога ўдзельнік самастойна накіроўваў арганізатарам вынік, зафіксаваны электронным JPS-дадаткам.

Прызёраў вызначалі сярод мужчын і жанчын у трох узроставых катэгорыях.

У старэйшай групе 50+ пераможцамі сталі Георгій Шпунтаў і Наталля Шумарава. А вось у абсалюце абышлося без нечаканасцяў: лепшыя вынікі паказалі самыя тытулаваныя атамшчыкі Вадзім Мацвійчук і Анастасія Новікава, якія пераадолелі 72,63 і 56,32 кіламетра адпаведна.

Як вядома, стаерскія дысцыпліны, якія перавышаюць стандартны класічны марафон (42,2 км), носяць прыстаўку «ультра». Таму віртуальнымі ультрамарафонцамi сапраўднага онлайн-забегу ва ўзроставай катэгорыі 35-49 гадоў могуць таксама лічыцца Марыя Парамонава (1 месца), Наталля Філіпава (2 месца) і аўтар гэтых радкоў (2 месца). Ва ўзроставай групе 35 гадоў і маладзейшымі такімі сталі Яўгенiя Ліпінская (2 месца), Антон Кавалеўскі (1 месца), Міхаіл Садоўскі (2 месца), Мікалай Шабараў (3 месца), Ігар Кавалькоў (4 месца).