Інфармацыйны цэнтр АЭС быў адкрыты ў Астраўцы яшчэ ў 2009 годзе і з часам набыў вялікую папулярнасць як сярод жыхароў горада, так і сярод яго гасцей. Дастаткова сказаць, што за ўвесь час працы яго наведала больш за 20 тысяч гасцей, што для невялікага горада не так ужо і мала.
А ў лістападзе 2020 года адчыніў свае дзверы яшчэ адзін інфармацыйны цэнтр, размешчаны ў дэманстрацыйным корпусе вучэбна-трэніровачнага цэнтра Беларускай АЭС. Гэта значыць знаходзячыся ў непасрэднай блізкасці ад атамнай электрастанцыі.
Гэты цэнтр больш сучасны, прасторны і светлы. Але, самае галоўнае, паколькі інфармацыйны цэнтр знаходзіцца ў лічаных метрах ад АЭС, кожны яго наведвальнік можа на свае вочы ацаніць маштаб самага грандыёзнага энергетычнага аб'екта нашай краіны!
Гэтай магчымасцю першымі, што цалкам відавочна, скарысталіся навучэнцы школ Астравецкага раёна. Спецыялісты інфармацыйнага цэнтра не толькі правялі частку экскурсіі на свежым паветры, распавядаючы дзецям пра асноўныя аб'екты АЭС, але і паказалі іх на шматлікіх макетах і мадэлях унутры цэнтра.
Традыцыйна, кожны госць павёз з сабой інфармацыйны буклет, каб не толькі лепш запомніць паездку на АЭС, але і расказаць пра яе сваім сябрам і бацькам.
Дарэчы, на наступным тыдні новы інфармацыйны цэнтр АЭС наведае некалькі груп дзяцей, якія знаходзяцца на адпачынку ў дзіцячым аздараўленчым цэнтры «Зубраня».
Наведванне цэнтра - бясплатнае. Трэба толькі загадзя прадаставіць пісьмовую заяўку. Якую менавіта - вам падкажуць па тэлефоне 8 015 91 46 605.
І яшчэ: інфармацыйны цэнтр у Астраўцы таксама працягвае сваю працу. Тэлефон інфацэнтра ў горадзе: 8 015 91 77 9 74; 77 9 75.
Сардэчна запрашаем!
