Маладыя людзі з усіх куткоў нашай краіны наведалі інфармацыйны і вучэбна-трэніровачны цэнтры Беларускай АЭС, лабараторыю псіхафізіялагічнага забеспячэння. Дзеці азнаёміліся з работай поўнамаштабнага трэнажора пульта кіравання энергаблокам і пункта радыяцыйнага кантролю ў вучэбна-трэніровачным цэнтры АЭС, даведаліся пра падрыхтоўку кадраў для атамнай электрастанцыі.

У лабараторыі псіхафізіялагічнага забеспячэння навучэнцаў пазнаёмілі з мерапрыемствамі псіхалагічнай падтрымкі супрацоўнікаў станцыі.

Сюрпрызам для дзяцей стала наведванне лабараторыі радыяцыйнага кантролю навакольнага асяроддзя. Спецыялісты лабараторыі паказалі абсталяванне радкантролю і расказалі аб прынцыпах яго работы.

Ужо традыцыйнай стала для навучэнцаў Тэхнапарка сустрэча з генеральным дырэктарам прадпрыемства Сяргеем Алегавічам Бабовічам. Кіраўнік Беларускай АЭС цёпла сустрэў хлопчыкаў і дзяўчынак, якія на станцыі не першы раз, а таксама не абышоў увагай навічкоў. Сяргей Алегавіч ужо неаднаразова расказваў юным гасцям пра ролю БелАЭС у эканоміцы краіны, падрыхтоўку персаналу атамнай станцыі, уласны вопыт работы.

На прыкладзе гульні-галаваломкі генеральны дырэктар растлумачыў рабятам, як важна працаваць у камандзе або прыняць правільнае рашэнне, зірнуўшы на сітуацыю з боку.

На мінулай сустрэчы Сяргей Алегавіч даў падрастаючаму пакаленню каштоўныя парады і пажаданні напярэдадні выбару прафесійнага шляху, акцэнтаваў увагу на тэме генацыду беларускага народа ў гады Вялікай айчыннай вайны, расказаў, як важна заставацца патрыётамі сваёй краіны.

"Мы выжылі, мы павінны ганарыцца сваёй краінай, толькі ў нашых сілах зрабіць нашае жыццё лепшым".