У складзе дэлегацыі на атамную станцыю прыехалі старшыня Беларускага саюза жанчын Вольга Шпілеўская, старшыня Гродзенскай абласной арганізацыі БСЖ Ірына Сцепаненка, жанчыны-кіраўнікі арганізацый і прадпрыемстваў, дзелавых колаў і бізнес-супольнасцяў Беларусі, жанчыны-спецыялісты атамнай галіны Расіі. 

Гасцей Беларускай АЭС сустракала і цёпла вітала намеснік міністра энергетыкі Рэспублікі Беларусь Вольга Пруднікава. Намеснік міністра праінфармавала ўдзельнікаў візіту аб гісторыі рэалізацыі ядзернай энергетычнай праграмы Беларусі, распавяла аб тэхнічных асаблівасцях АЭС і яе інтэграцыі ў эканоміку краіны.

Аб бягучай сітуацыі на БелАЭС распавёў намеснік генеральнага дырэктара прадпрыемства Барыс Парамонаў.

У інфармацыйным цэнтры атамнай электрастанцыі ўдзельнікі візіту даведаліся пра прынцып атрымання ядзернай энергіі, бяспекі і эфектыўнасці АЭС. Пра гэта жанчынам распавялі не толькі штатныя супрацоўнікі інфармацыйнага цэнтра, але і прафесійныя энергетыкі з вялікім вопытам работы: намеснік начальніка вучэбна-трэніровачнага цэнтра АЭС Сяргей Краўцоў і начальнік аддзела падрыхтоўкі персаналу вучэбна-трэніровачнага цэнтра Беларускай АЭС Сяргей Горын.

Пабывалі жанчыны і ў вучэбна-трэніровачным цэнтры атамнай станцыі, дзе даведаліся пра тое, якая ўвага надаецца на Беларускай АЭС падбору і падрыхтоўцы персаналу.

За час экскурсіі прадстаўніцы беларускага і расійскага жаночых грамадскіх аб'яднанняў задалі мноства пытанняў і на ўсе атрымалі вычарпальныя, кампетэнтныя адказы.