Першы намеснік начальніка Дзяржатамнагляду Сяргей Дробат на секцыі па пытаннях бяспекі выкарыстання атамнай энергіі прадставіў вопыт Беларусі ў фарміраванні галіновай рэгулюючай інфраструктуры. Паводле яго слоў, у Беларусі актыўна рэалізуюцца праграмы па развіццю ўнутрыведамасных камунікацый, падрыхтоўкі персаналу для рэгулюючых органаў, наладжана эфектыўная сістэма інфармавання грамадскасці аб ходзе рэалізацыі нацыянальнай атамнай праграмы, у прыватнасці, аб будаўніцтве Беларускай АЭС.

"У кастрычніку бягучага года прадстаўнікі МАГАТЭ наведалі нашу краіну з місіяй па ацэнцы рэгулюючай інфраструктуры ядзернай і радыяцыйнай бяспекі. Па яе выніках эксперты агенцтва адзначылі адкрытасць Дзяржатамнагляду і высокі ўзровень прынятых стандартаў", - адзначыў Сяргей Дробат.

Міжнародны форум-дыялог - традыцыйная пляцоўка для сустрэчы і дыскусій расійскіх і замежных экспертаў, прадстаўнікоў атамнай галіны і грамадскасці па важных пытаннях выкарыстання атамнай энергіі. Асноўнымі тэмамі форуму сталі экалагічнасць, бяспека і эканамічная эфектыўнасць атамнай энергетыкі; аспекты яе рэгулявання; вывад з эксплуатацыі аб'ектаў выкарыстання атамнай энергіі; падыходы краін да рэабілітацыі тэрыторый; абмен вопытам пры ўзаемадзеянні з грамадскасцю і зацікаўленымі бакамі пры абмеркаванні пытанняў бяспекі пры рэалізацыі атамных праектаў.